Mazkur maqolada mantiqiy masalalar ta`limining zamonaviy ta`lim tizimidagi o`rni va ahamiyati milliy hamda xalqaro pedagogik yondashuvlar uyg‘unligi asosida ilmiy-nazariy jihatdan tahlil qilinadi. Tadqiqot jarayonida mantiqiy masalalarning o`quvchilarda mustaqil, tanqidiy va ijodiy fikrlashni rivojlantirishdagi didaktik imkoniyatlari yoritiladi. Milliy yondashuvlarning o`quvchilarning yosh va psixologik xususiyatlari, madaniy muhit hamda an`anaviy pedagogik tajribaga tayanishi, xalqaro yondashuvlarning esa kompetensiyaviy yondashuv, real hayotiy vaziyatlarga asoslangan topshiriqlar va raqamli ta`lim texnologiyalaridan foydalanishga yo`naltirilgani asoslab beriladi. Shuningdek, PISA va TIMSS kabi xalqaro baholash dasturlari doirasida mantiqiy masalalar ta`limining ahamiyati ochib beriladi. Tadqiqot natijalari mantiqiy masalalar ta`limida milliy qadriyatlarni saqlagan holda xalqaro ilg`or tajribalarni integratsiyalash ta`lim samaradorligini oshirishini ko`rsatadi.