Maqolada o‘zbek jurnalistikasining nisbatan yosh, ammo tez rivojlanayotgan turi — iqtisodiy jurnalistika shakllanishi va rivojlanishi, ushbu yo‘nalishda faoliyat yuritayotgan ommaviy axborot vositalarining asosiy vazifalari tahlil qilingan. Milliy hamda xorijiy olimlarning ilmiy qarashlarini qiyosan o‘rganilib, iqtisodiy nashrlarning tipologik xususiyatlari tadqiq qilingan. Hozirgi bozor iqtisodiyoti va o‘tish davrida bosma OAV adadi, auditoriyasi, tarqalish hududi va ommaviyligini belgilab beradigan asosiy omil, janrlar masalasi ko‘rib chiqilib, ilmiy tavsiyalar berilgan. Maqolaning dolzarbligi shundaki, unda nisbatan kam o‘rganilgan iqtisodiy jurnalistika muammolari uning tipologik xususiyatlari orqali ko‘rib chiqilgan. Bosma matbuot tipologiyasida boshqa OAV turlaridan farqli ravishda adad, moliyalashtirish tushunchasi mavjudligiga eʼtibor qaratilib, keyingi yillarda o‘quvchilar auditoriyasi qisqarib borayotgani aniq misollar orqali dalillangan. Tabloid jurnalistika unsurlari saqlanib qolayotgani, gazetalar sahifalarida eʼlonlarga nisbatan ko‘p joy ajratilib, iqtisodiy tahlil nisbatan kamaygani asosiy muammolardan biri sifatida keltirilgan. Iqtisodiy nashrlar duch kelayotgan shu kabi masalalar o‘rganilib, yechimi yuzasidan taklif va tavsiyalar berilgani uning ilmiy jihatdan yangiligini ko‘rsatib turibdi. Ularning amaliyotga tatbiq etilishi esa iqtisodiy nashrlar auditoriyasini nafaqat saqlab qolish, balki kengaytirish, adadini oshirishga xizmat qiladi.