Maqolada zamonaviy o‘zbek she’riyati xususida so‘z yuritilib, o‘zbek adabiyotshunosligida she’riyatning mavzu qamrovi, ijodkorning obraz yaratish mahorati o‘rganilgan. She’riyatni anglagan shoir “chin she’r yurak sezgilarini ko‘rsatmakligini, vazn va qofiya esa uning bezagi ekanligini“ biladi. Shunday ekan, poeziya dunyoning aksi ham, uni o‘rganish yo‘li ham emas, balki dunyoni yaratishdir. Ammo bugungi she’riyatda modernizmning ta’siri kuchli ekan, u bevosita chuqur mushohada talab etadi. Shu bois ham ushbu tadqiqot ishida bugungi o‘zbek she’riyatida falsafiy qarashlarning yangicha ifodasi, individuallik xususiyati, ijodkor uslubining badiiy talqini masalasi Sharq falsafasi hamda ijodkor badiiyati bilan bog‘liqlikda tadqiq etildi. Zamonaviy o‘zbek she’riyatida falsafiy qarash va modernistik talqin, ijodkor uslubi, obraz tabiati, badiiy-estetik xususiyatlarning namoyon bo‘lishi, shakllanishi, ijodkor tafakkur tarzining o‘sib borishi asosida tahlilga tortish ishimizning maqsadi sanaladi. O‘zbek she’riyatdagi majoziy-falsafiy obrazlilik masalasi, she’r kompozitsiyasi, ifoda ko‘lami va mavzu yo‘nalishi; she’riyatda Sharq falsafasi, falsafiyijtimoiy, ramziy-majoziy, xalqona ohanglari bilan ijodkorning voqelikka munosabati va ruhiy olami bog‘liq tarzda tadqiq etildi. Shuningdek, o‘rganilgan ilmiy muammo yuzasidan tegishli xulosalar chiqarildi. Shu jumladan, maqolada zamonaviy o‘zbek she’riyatida XX asrning so‘nggi choragi va XXI asrning ilk bosqichida shoirning ijodiy kayfiyati bilan birga obraz yaratish uslubi ham bir qadar yangilanganligi, obraz tabiatiga xos individuallikdan anglashilgan ma’no alohida xususiyat kasb etib, muayyan ma’no tashuvchi, uni kitobxon tafakkuriga anglashinarli darajada yetkazuvchi va ayni damda teran fikrlashni talab qilganligi xususida so‘z yuritiladi. Zamonaviy poeziyada globallashuv hodisasining tarixi, uning adabiy jarayonga ta’siri, milliy adabiyotlar taqdiri va ularning yashovchanlik xususiyatlari, hodisaning o‘zbek she’riyatiga ta’siri, zamonaviy she’riyatda shakl va mazmun mutanosibligi masalasi adabiy-estetik kategoriya sifatida tadqiq etilgan