Мазкур мақола “Икки галактика: Ноам Хомскийнинг тил галактикаси ва Герберт Маклюэннинг технологик галактикаси” деб номланган туркумнинг учинчи, якуний қисмидир. Ушбу қисмда канадалик олим Герберт Маклюэннинг оммавий аудитория томонидан медиа хабарларини ноанъанавий қабул қилиниши билан боғлиқ бир қатор ғояларини исботлашга ҳаракат қилинган. Касбдошларидан фарқли ўлароқ, Маклюэннинг фикрича, аудиториянинг диққати хабарларнинг мазмунидан кўра кўпроқ, биринчи навбатда, медиа оммага қандай таъсир қилганига қаратилади. Олимнинг фикрича, медианинг канал хусусияти уларда берилган янгилик мазмунидан кўра муҳимроқдир. Шундай қилиб, олимнинг қарашларига кўра, медиалар фаолиятининг асосларини, энг аввало, тотал характерга эга бўлган индустриал-ахборот технологиялари ташкил этади. Бу ҳолатда мазкур технологиялар икки томонлама ўзаро таъсирга эга бўлади. Биринчидан, журналистлар ахборот узатиш канали орқали аудиторияга таъсир этади. Иккинчидан, аудитория, айнан шу канал ёрдамида, ахборотни қандай қабул қилганлик даражасига қараб, журналистларга таъсир этишга ҳаракат қилади. Г.Маклюэннинг ижодий таржимаи ҳолини ўрганиш шуни кўрсатмоқдаки,, мазкур ёндашув шу қадар янги бўлиб чиқдики, мутахассислар олимнинг ушбу қарашини 30 йил давомида қабул қилолмаганлар. Мазкур бўшлиқни тўлдириш учун бўлса керак, бугунги кунда мутахассислар томонидан Маклюэнга медиалар башоратчиси деган нисбат берилмоқда.