Дунё миқёсида журналистика соҳаси янги рақамли технологияларни фаол ўзлаштириб бормоқда. Ўзбекистон миқёсида рақамли медиа технологиялари қурилмалари илмий тадқиқотлари ўрганилиш даражаси медиа оламининг бошқа соҳаларига қараганда анча илгарилаб кетди. Ушбу мақолада рақамли медиа платформанинг янги ахборот ускуналари ҳақида фикр юритилади. Сўнгги пайтларда иммерсив журналистика медиа тадқиқотчилари ва соҳа вакилларининг муҳокама мавзусига айланди. Ғарб олимларининг бу борадаги илмий тадқиқотларини ўрганиш жараёнида ахборот узатишнинг янги – панорамали кўриниши ахборот истеъмолчисини воқеликнинг бевосита иштирокчиси сифатида намоён бўлишини талқин этаётганларининг гувоҳи бўлдик. Мазкур илмий мақола VR технологияларининг имкониятлари ва самараси хорижий медиаолимлари томонидан рақамли технологиялар бўйича олиб борилаётган тадқиқот ишларига асосланган масалаларни қамраб олган. Муаллиф ўз мақоласида иммерсия эффекти ахборот маҳсулотларини ишлаб чиққан ва амалий тадқиқотларини олиб борган компания, университетлар, марказлар, алоҳида изланувчилар ишини батафсил ёритиб берган. Мазкур технологик янгиликка катта қизиқишларнинг сабабларидан бири асли ҳаётий ҳақиқатга худди ўхшаш бўлган воқеликларни, образларни юқори аниқликда рақамли нусхасини яратиш имкониятига эга технологиялардир. Унинг яна бир хусусияти – журналистик фаолиятда ахборот “иштирокчиси” эффектида ахборот узатиш имкониятидир. Иммерсив журналистикага назарий ёндошувлар талқини дунё олимлари ўртасида аллақачон баҳс ва мунозаралар мавзусига айланган. Иммерсия эффектига эришишнинг кўплаб усуллари мавжуд. Булардан бири виртуал дунё технологияларини қўллаш, яъни виртуал ҳаёт муҳитига шўнғишдир. Виртуаллаштириш технологиялари бир неча ўн йиллик тарихга эга. Шунингдек, VR технологиялар журналистикада янги йўналишнинг асоси бўлиб, назарий, илмий, амалий ва психологик нуқтаи-назардан тадқиқотлар объекти сифатида миллий тадқиқотлардаги илмий таҳлилларда ўз аксини топиши зарур.