2018 йилнинг сентябридан 2019 йилнинг июнь ойига қадар мен Ўзбекистон давлат жаҳон тиллари университети, Ўзбекистон журналистика ва оммавий коммуникациялар университети ҳамда Ўзбекистон Миллий университетида талабаларга корейс тили ва журналистика бўйича таълим бердим. Корейс тили, лингвистикаси бўйича ўқитар эканман, бу борада талабаларга мос ўқув материаллари камлигини англадим. Шунинг учун мен онлайн манбалардан маълумот тўплаб, бир неча китобларни таҳрирлаб, корейс тилидаги янгилик-мақолаларни йиғиб бир китоб ҳолига келтирдим. Аммо шундай бўлса-да, мен ишлаб чиққан китоб ўзбек талабалари томонидан кўп ўқилмас экан, унинг самараси жуда кам бўлади. Корейс тилидаги янгиликлардан II курс талабаларига “Мамлакатшунослик” фанини ўқитишда фойдаланиш яхши самара берди.Журналистикани ўқитиш давомида инглиз тилидаги адабиётлардан фойдаландим, шунингдек, талабаларга бу китобдан нусха олишга рухсат бердим ва уларга дарсдан ташқарида ҳамда дарс пайтида ҳам ушбу китобдан фойдаланишларини тавсия қилдим. Аммо менинг бу тавсияларим унча муваффақиятга эришмади, сабаби — ўзбек талабаларида ўзи билан китоб олиб юриш одати унчалик шаклланмаган. Семинар дарсларни олиб боришда талабаларга ҳам инглиз тили, ҳам рус тилида мулоқот қилиш имконини берганим самарали бўлди. Шунингдек, жонли интерактив дарслар давомида талабаларга тақдимот қилиш имконини берганим муваффақиятли бўлди. Фаол тақдимотчиларга 5 баҳо ваъда қилганим яхши натижалар берди.